Lundarævintýri framundan

Hæ elskurnar mínar, erum farin til Lundar að skoða hús, skóla og skemmta okkur.

Læt heyra í mér eftir helgina
elska ykkur
Brynjalilla

að fíla og þola ekki

Ég fíla eftirfarandi:
1. Hafragraut á morgnanna með fræum, kanel og sænskri kotasælu. Bragðast betur en það hljómar.
2. Chaite þessa dagana, dásamlegt indverskt te með flóaðri mjólk og minnir mann á hlýju og öryggi.
3. Msn, elska að blaðra við vini mína og fjölskyldu.
4. Freyðibað og hvítvín í hendi og munni.
5. Morgnar um helgar þegar krakkarnir skríða upp í.
6. Mjúk tónlist sem gerir mann rólegan, hlusta mikið á Cörlu Bruni þessa dagana.
7. Kúbverskt salsa.
8. Þegar ég er þreytt og önug og Valli kemur óvænt með kerlingamynd handa mér og súkkulaði.
9.Fjöll, jöklar, hafið, náttúran öll.
10. Vinkonur og fallegir kjólar.

Ég þoli ekki eftirfarandi:
1. Lifur
2. Þegar ég kaupi mér flík sem ég fer svo aldrei í.
3. Skítug gólf.
4. Heimþrá
5. Væl í Svíum og vanþroska í að taka ákvarðanir
6. Þegar fólk reykir í bíl.
7. Að éta yfir mig.
8. Að skipta um sængurver.
9. Að geta ekki knúsað vini mína þegar þeir þurfa á því halda.
10. Að vera þreytt og hugmyndasnauð.

En þið en þið, hvað fílið þið og hvað þolið þið ekki?

yndislegur dagur

Þetta var yndislegur dagur. Hann byrjaði á að prinsessan opnaði pakkana sína og gleðin var mikil þó þeir innhéldu hvorki trampolín, garð né dúkku sem grætur alvöru tárum. Prinssessutjald eins og Helga vinkona hennar í Lundi á vakti mikla kátínu og Prinsessukjóllinn og litlubarnabratzsdúkkan frá Herði Breka gerðu það að verkum að systkinn föðmuðust svo fallega, þakklætið var einlægt og Hörður Breki svo glaður því eins og hann orðaði það svo vel "mamma mér finnst rosalega gaman að fá gjafir en það er eiginlega skemmtilegra að gefa þær".

Afmælið hófst svo formlega klukkan hálftvö, Dagrún var búin að dubba sig upp og henni leið vel, spennt yfir athyglinni og öllu tilstandinu og ákaflega meðvituð um að nú væri hún að verða fimm ára og velti m.a. fyrir sér hvort nú færi hún að missa tennur og hvort hún væri örugglega ekki aðeins stærri en í gær. Gleðin ríkti frameftir degi, hér var borðað sælgæti, kökur, popp og ís, hér var dansað og leikið sér. Þegar prinsessuafmælið var búið þá var "fullorðins" veislan sem ríkti fram á kvöld. Héðan fóru allir sáttir og ánægðir. Kvöldið endaði svo á því að börnin fengu max hamborgara og sofnuðu þreytt en glöð. Við foreldrarnir stóðum í tiltekt frameftir laugardagskvöldi og vorum auðvitað glöð líka yfir vel heppnuðum degi en of þreytt til að nenna að opna hvítvínsflöskuna sem var í kæli inn í ísskáp, hún bíður betri tíma.

Afmælisundirbúningur í fullum gangi, kremgerð, skreytingar og tiltekt. Ungfrúin í baði, vill sofa með fléttur í nótt svo hún verði með krullur á morgun...mér finnst þetta svo gaman og morgundagurinn uhmm þá verður stuð og át verður í óhófi.

Vildi samt óska þess að fjölskyldan og vinirnir kæmust líka í herlegheitin...framhald fljótlega

með fjóra í útvíkkun

Fyrir fimm árum var ég sirka 20 kg þyngri en ég er í dag, kasólétt og beið spennt eftir komu krílsins sem var búið að hreiðra vel um sig í móðurlífinu mínu. Ég hvíldi mig, borðaði kökur og straujaði lítil ungbarnaföt. Þess á milli naglalakkaði ég mig, fór í klippingu og dekraði við mig. Dekrið skilaði sér því þegar fyrsti hríðarverkurinn kom klukkan 2 um nótt, var ég svo tilbúin í slaginn. Að vísu undrandi þar sem krílið ákvað að koma uppsettan dag en ekki láta bíða eftir sér eins og frumburðurinn gerði. Ég fór í bað, las í bókinni "máttur jarðar" eftir Jón Björnsson en amma Dagbjört hafði gefið mér bókina og þegar hún dó 5 vikum áður ákvað ég að lesa hana. Ég læddist um því það var svo notalegt að njóta þessarrar stundar í einrúmi, eitthvað svona óútskýranlegt milli krílsins og míns. Um morgunin þegar búið var að skutla Herði Breka á leikskólann fórum við hjónin upp á fæðingadeild og allt var komið vel af stað, 4 í útvíkkun. Mikið varð ég hissa og glöð því fyrri fæðingareynsla var þannig að þegar ég var komin með 2 útvíkkun þá hélt ég í fullri alvöru að verra gæti það ekki orðið...það var vitlaust. En við fengum bæjarleyfi því allt í einu varð það svo gríðarlega mikilvægt að kaupa barnabílstól. Hríðirnar ágerðust, man einmitt eftir einni vænni á bílastæðinu og ég sá að ég færi nú ekki á bláu könnuna í leiðinni.
Við tók fín fæðing, drulluvont en allt gekk svo snurðulaust, ég hélt heljartaki í Valla og hláturgasgrímuna meðan sóttin herjaði og gleymi ekki þegar fyrsti rembingurinn kom með tilheyrandi rembingshljóðum, heilbrigð stúlka fæddist svo 14:45 16. október. Hún Dagrún Kristín mín sem kom beint upp á magann minn og það var ást við fyrstu sýn.

Nú er skottið mitt að verða fimm ára, mikið um að vera og ný afmælisplön hjá ungfrúnni hvern dag. Það er búið að baka masarínumuffins. gulrótarköku, marengstertu að hætti ömmustínu, súkkulaðiköku sem verður þegar upp er staðið pils alsett sælgætisgimsteinum og sælgætisperlum og Bratzdúkka með uppsett hárið fær heiðurinn að eiga pilsið. Dagrún er prinsessa, hún vill bara vera í bleiku og helst í kjól eða pilsi. Hún er sjálfstæð og eftir því ákveðin að fá sínu framgengt en nokkuð hlýðin. Hún elskar að sulla og baðar gjarnan dúkkurnar sínar, þó ekki upp úr klósettinu eins og ég gerði víst eitt sinn á jóladagsmorgni. Hún er tónelsk og finnst mjög gaman að syngja og hlusta á tónlist. Hún er félagslynd, ráðrík, brosmild og er hrædd við þrumur og eldingar. Henni finnst gott að knúsast og elskar kartöfluflögur og nammi. Hún er mjög meðvituð þessa dagana að læra stafina og segir gjarnan ábyrgðarfullt að nú þurfi hún að gera lexíurnar sínar og á þá við íslenskukennslu heimilisins sem felst mest í stafainnlögn. Hana langar mikið í trampolín og garð og dúkku sem getur grátið alvöru tárum.

Mikið er maður nú lánsamur.

Alibaba

Ég er nýkomin í gegnum ákveðið tímabil sem líklega flestir þekkja sem búa eða hafa búið í útlöndum. Tímabilið einkennist af ákveðnu rótleysi sem lýsir sér í óþreyju og óþolinmæði. Þörfin að tilheyra samfélagi algjörlega þar sem tungumál, trúarbrögð og menningarlegur bakgrunnur er tiltölulega einsleitur vaknar. Dagdraumar um að búa í litlu íslensku sveitaþorpi þar sem farið er á kökubasar og bingó um helgar og daglegt líf einkennist af því að baka brauð og sinna vinnu sem er algjörlega sniðin að þínum þörfum skjóta upp kollinum.

Þessu tímabili er lokið í þetta sinn. Ég nýt þess að fara í "alibaba" búðina þar sem ég kaupi mér falafel, framandi grænmeti, þurrkaða ávexti af öllum mögulegum og nánast ómögulegum gerðum og heyra töluð allavega 10 tungumál í frekar litlu rými. Ég nýt þess að fara í skólann, gefa mér færi á að vera listamaður og spjalla við Finna, Svía, Breta og Mongóla og ég er þakklát að börnin mín og við hjónin fáum góðan skammt af menningarlegum breytileika sem vonandi skilar sér í aukinni víðsýni og aðlögunarhæfni. Í gær fékk ég aftur tilfinninguna "ég á heima í Örebro" mjög velkomin tilfinning. Var búin snemma í skólanum, fór á markaðinn "bra og begagnad" eða gott og notað. Keypti mér 26 heklaða pottaleppa og 10 blúndudúka og markmiðið er að búa til listaverk þar sem ég held áfram að þakka konum fyrir mig.

Fór á kaffihúsið "Bara Vara" og hitti Lilý vinkonu mína. Við drukkum Chai te og áttum góða gæðastund. Sótti börnin, gaf þeim graut, sótti Lilý og við fórum í Willys. Ég verslaði matvörur, keypti m.a. fisk frá Víetnam sem er góður í wok og afar ljúffengur. Þaðan fórum við í Ikea því jólin eru komin þar og keyptum okkur ilmkerti. Áttum svo gott samtal á leiðinni heim í haustþokunni. Heima beið Valli, börnin sofnuð og ég hlammaði mér í sófann og sofnaði fyrir framan sjónvarpið.

Fljótandi terta á laugardegi

Eiginlega fyrsti áþreifanlegi haustdagurinn í dag, skýjað, logn og svo yndislega milt veður. Svona veður gerir mig rólega og mjúka. Fórum út með krakkana, sem endaði þannig að Valli spilaði fótbolta við Hörð Breka og fleiri stráka. Dagrún var liðtæk til að byrja með en svo kenndi hún mér leikinn "farbror lejon vad är klockan" sem er nokkuð áþekkur og 1,2,3,4,5 dimmalimm. Þetta var stuð. Síðan fórum við heim, borðuðum brauðið sem Valli bakaði í gærkveldi með smjöri og fíkjusultu frá Líbanon krydduð með anís, ótrúlega gott. En rúsínan í pylsuendanum var drykkurinn minn sem ég verð að segja ykkur frá. Hún Lilý mín kynnti mér í gær fyrir Chaitei, fljótandi terta. Unaðslegur drykkur sem er drukkinn allt árið um kring í Indlandi. Bragðið er svo gott fyrir kroppinn og sálina og vekur upp minningar um inniveru í stórhríð undir sæng, rafmagnsleysi, vasaljós og Enid Blyton. Kaffi, kleinur og kryddbrauð hjá ömmu...drykkur sem sé sem allir þurfa að njóta. Í þessum skrifuðum orðum er afslöppun í gangi, telyktin fyllir húsið, strákarnir spila playstation, Dagrún er að prinsessast og ég er jú hér við tölvuna.

germanía

Jú þetta var góð ferð og mikið lifandi ósköp sá ég mikið af list. Mest samtímalist misgóðri. Margt mjög innihaldsríkt, fallegt, hrífandi og talandi, annað ljótt, rýrt og tómt og loks góður skammtur af milliveginum sem sé hvorki né. Ég heimsótti ásamt skólasystkinum mínum og kennurum hin ýmsu listasöfn, fór í háskólaheimsóknir og hitti listamenn við störf...fékk svona u.þ.b. þúsund hugmyndirog vonandi blæs ég lífi í allavega eina ef ekki tvær. Allavega þrái ég ekkert heitara núna en að prófa nýju penslana og litina mína sem ég keypti mér í Köln.

Langar að segja ykkur frá einu verki sem mér fannst svo fallegt og gefandi, heitir brainforest eftir Gerdu Steiner og Jörg Lenzinger.

http://www.steinerlenzlinger.ch/sweatp_brainforest.html

gæti skrifað heillangt um þetta fallega verk. Ímyndið ykkur breiða hringstiga upp margar hæðir og rýmið sem myndast á milli, hreint og hvítt. Rýmið er fyllt af greinum með óteljandi fallegum hlutum úr ólíkum efnivið sem finnst í hversdagsleikanum, fjaðrir, plastleikföng, steinar, garn...fjársjóðir sem maður sankaði að sér í æsku. Algjörlega hægt að gleyma sér í þessu verki, greinarnar leiða mann alltaf á nýjan og nýjan hlut. Minnir á ærsl og hlátur, áhyggjuleysi...

En það er gott að vera komin heim, fjölskyldan, hreint utan um sængurnar, hafragrautur, kósí kvöld, hehehe hljómar eins og ég hafi verið ár og öld í burtu en lýsir líklega vel hversu margt ég upplifði á einni viku.

komin heim, Düsseldorf, Köln, Hamborg og svo Örebro. Sá mikið af list, er núna að hvíla mig knúsa trallann minn, lillann og lilluna læt heyra betur í mér fljótlega, knús og kossar!

jú eitt að lokum:

http://www.youtube.com/watch?v=2IV6rQxfk48&mode=related&search=

Yndislegi september

Yndislegi september. Þetta er búið að vera góð vika, veðrið hefur leikið við okkur og ástæða til að vera í pilsi og ilskóm. Tobban okkar kom í heimsókn og lífgaði upp á hversdagsleikann. Hér var haldin mezoveisla með falafel, eggaldinídýfu, tabouleh og dýrindis hnetusósu. Auðvitað var farið seint að sofa veislukvöldið.

Ég er búin að vera á kafi í að safna "erfiðum hugsunum" og játningum og myndskreyta þær, sé fyrir mér litla bók. Hugsunum og játningunum safna ég í sérstakan póstkassa sem er staðsettur í skólanum mínum, vonast til að gefandinn finni fyrir létti þegar hann póstsetur skilaboð sín. Hann fær meira að segja hlutbundið faðmlag að launum í formi hvíts steins með ávölum formum. Vonast einnig til að geta sett póstkassa hér og þar og safnað hugsunum frá ólíku fólki og gert litla rannsókn í leiðinni á því hvað einkenni erfiðar hugsanir og játningar ákveðinna stétta, aldurs, þjóðerna og svo framvegis og hvort það sé yfirleitt einhver munur þar á. Bendi á að það er hægt að senda mér nafnlausar hugsanir og játningar í pósti en gott er ef þeim fylgja upplýsingar um kyn og nokkuð nákvæman aldur.

Fann frábæra síðu í morgun sem skýrir dugnað minn í muffinsgerð í dag

http://www.dagensmuffin.se/recipes.pl?category=S%F6ta%20muffins

mæli sérstaklega með masarínumuffins og súkkulaðibitamuffins. Þau runnu allavega ljúflega niður í litla og stóra maga. Lilý lillan kom og færði með sér gleði, hún styrkir óneitanlega félagslegt net okkar sem hefur gisnað verulega eftir að Andri, Rósa, Eva og Daði fluttu til Gautaborgar. Við söknum þeirra voðalega.

Annars er ég svo bara að fara til Þýskalands á mánudaginn, tek góðan myndlistarúnt í Düsseldorf, Bonn og Köln. Hlakka til að eiga viku í Þýskalandi og á leiðinni þangað ætla ég að lesa Maus I og Maus II eftir Art Spiegelmann svona til að fá sterkari stemmingu, þið sem þekkið mig vel vitið hversu mikil stemmingamanneskja ég er!

Vona að næsta blogg verði fullt af góðum sögum og minningum um vikuna sem framundan er.

ps: verð að bæta þessu við núna á sunnudagsmorgni eftir að dóttir mín er búin að vera í frekjukasti þar sem hún heimtar meira muffins...þetta kom mér í gott skap eftir muffinsbaráttuna miklu...
http://www.123.is/asgeirpall/files/Reykjav%EDk%20S%ED%F0degis%20fyndi%F0.mp3

Skólaljóð

Ég heimsótti íslenska vinkonu mína í gær, súkkulaðikaka og göngutúr með börnin í yndislegu veðri féllu í góðan jarðveg. Happafengur dagsins var hinsvegar sá að ég fann bókina Skólaljóð. Þessi bláa sem við öll eldri en 30 ára líklega könnumst vel við. Ég fékk bókina lánaða og er að rifja upp kynni mín af henni. Skólaljóðin eru myndskreytt af Halldóri Péturssyni og ég man ófá skiptin þar sem ég dundaði mér við að teikna mínar útgáfur af myndunum hans og svei mér þá ef ég lærði ekki nokkur ljóð í leiðinni. Mig langar svo að eignast þessa bók og hef alltaf augun opin þegar ég kemst á íslenska bókamarkaði, hef enn ekki fundið bókina. Er mikið að lesa ljóð núna, sérstaklega þessi rómantísku í takt við Íslandssöknuð minn sem er samt einhvernveginn svo þægilega ljúfsár. Læt ljóð fylgja með en samt ekki The Rose eftir William Blake sem ég fékk afhent við gula póstkassann.

Tilfinning, Álfheiður Kristveig Lárusdóttir

Heyra hvin í trjánum
og vera hlýtt,
heyra fugla syngja
og syngja með,
sjá fiska í vatninu
og synda með,
finna lífið fljúga áfram
og halda áfram með.



Ég byrja alltaf í september að hugsa um jólin, þannig hefur það alltaf verið að jólatilhlökkunin er mikið til tekin út í þeim mánuði, veit að því er þannig farið hjá systur minni líka, en þess vegna verður þetta ljóð að fylgja með.

Desember, Jón úr Vör

Vetrarjómfrú
með langar fléttur,
rólur
handa englum,

stráir örsmáum
rúsínum á
hlaðsteinana:

Kandíshjarta,
gullterta,
silfurkleina,
stjörnubjart
jólabrauð.

Upp í
norðurljósaskýjunum
kindur á fjörubeit.

Gulur póstkassi

Ég safna minningum af öllum gerðum. Ekki bara mínum heldur líka annarra. Ef þú átt minningu sem þú vilt deila með þér viltu senda mér hana?


Þessi hríslandi og umlykjandi tilfinning að vera skotin í strák. En hafa ekki hugmynd um hvort framhald yrði á ástum og ástríðu sem vöknuðu á ströndum Spánar. Urðum klaufalega viðskila á Keflavíkurflugvelli en bréfsnifsi í peningaveski gaf fyrirheit um áframhald. Var sólbrún í sveitinni hjá systur minni, ég var í gulri peysu og dökkgrænum gallabuxum þegar síminn hringdi. Voðalega var gaman að heyra í honum og við ákváðum að hittast. Ég sagði honum að ég væri í sveitinni og hann fyndi mig við afleggjarann þar sem guli póstkassinn væri. Ég labbaði niður á veg í haustmyrkrinu. Engir ljósastaurar en rataði á gula póstkassann sem sást auðvitað ekki í myrkrinu frekar en hinir gulu póstkassarnir við bæina í kring. Hann fann mig og var með ljóð handa mér.

isländska häxan tittar inn i din framtid!

Ok ég er enn ekki byrjuð í skólanum og er algjörlega að verða viðþolslaus eftir vinnustofunni minni sem býður mín með óþreyju, björt og hrein með góðum glugga og þiljum til að loka af þegar ég þarf að vera í einrúmi...er byrjuð að vinna hérna heima en það er ekki það sama og tölvan lokkar óneitanlega.
það sem ég er búin að gera í dag klukkan 9:51
Ræktin
klæða börn
ganga frá morgunverðaleifum
Búa um rúmin
sópa
Fara í sturtu
Fara með Dagrúnu á leikskólann
borða hafragraut
Opna skissubókina mína
Opna tölvuna
Fara daglegan bloggtúr
Fara á spámanninn, hversu aumkunarvert er það fyrirgfefiði og skilaboðin voru eftirfarandi:

7 bikarar

Ekki gleyma þér í draumalandinu góða. Þú ert fæddur hugmyndasmiður en átt það til að gleyma stund og stað í tíma og ótíma. Væntingar þínar eru miklar til lífsins en þér er hér bent á að ákveða hvert þú ætlar þér.

Fyrr en síðar ættir þú að ákveða hvað er þess virði að vinna að með raunsæju hugarfari og hvað telst til skýjaborga. Kannaðu alla möguleika áður en þú ákveður þig.

Ígrundaðu val þitt alla leið og spurðu sjálfið hvaða ákvörðun færir þér hamingju.

Ég segi nú bara "kræst"

Skissubókin liggur nú opin, ég er að gera ákaflega innihaldsríkt blogg sem mun án efa færa þeim gæfu sem lesa og þeir munu finna hamingjustjörnuna svo lengi sem þeir halda áfram að gefa af sér til náungans, múhahhahaha! Ég ætti kannski að opna sænska spámannslínu, isländska häxan tittar inn i din framtid!

Vinkonur

Eg hitti vinkonu mina i dag sem eg hef ekki hitt i 6 ar en vid eigum thad sameiginlegt ad vera badar myndlistarkonur asamt fleiru. Thad var eins og vid hefdum sidast hist i gaer. Eg hugsa oft um hversu lansom manneskja eg er. Eg a vinkonur a ollum aldri sem eru mer svo mikilvaegar. Eg er heppin ad hafa kynnst svona flottum stelpum i gegnum tidina. Thaer hafa skemmt mer, kennt mer, hlegid og gratid med mer og eru svo yndislegar allar a sinn hatt. Eg veit ekki alveg afhverju thessar vinattur hafa verid mer svo mikid umhugsunarefni og uppspretta til listskopunar undanfarid. Hugsanlega er thad fjarlaegdin sem eg upplifi svolitid nuna svona fjarri heimahogum og hitti ekki vinkonur minar eins reglulega og eg vildi. Hugsanlega er eg lika bara "brynjuleg" i kvold thar sem eg er ad lesa bokina Huldukonur i islenskri myndlist, Hrafnhildur Schram.2005 og hlusta um leid a disk med Carla bruni, quelqu'n m'a dit og sotra hvivin med!

Laet fylgja nokkrar myndir af godum vinkonum og godum stundum en thetta er svo sannarlega ekki fullnaegjandi eins og thid vitid!

fidringur

Munid thid hvernig thad var thegar madur byrjadi fyrst i haskola? Eg er med eina af ungu visindakonunum minum herna i Orebro en hun var ad byrja i haskolanum herna....madur faer nettan firding og langar i eitt augnablik aftur i boknam. Thad er athyglisvert ad lesa baeklingana sem nyir haskolastudentar fa her i Orebro...their fa umsjonarmenn sem syna theim allar vistaverur skolans, thad eru ferdir um Orebro thar sem adkomnir fa upplysingar um stadinn, thad eru party a hverju kvoldi "mingelkvall" med skemmtiatridum, mat og drykk, (serstakt simanumer sem fylgir til ad hringja oghlata vita ef madur hefur ofnaemi fyrir einhverju) en serstaklega tekid fram ad madur thurfi ekki ad drekka afengi ef madur vill thad ekki....skondid en vissulega er vel tekid a moti nynemum herna i Orebro, svei mer tha ef sumar menntastofnanir maettu ekki taka ser thad til fyrirmyndar...en lifid er ju odruvisi a froni, veit ekki medalaldur haskolanynema heima en hann er laegri her thar sem flestir skrida ur mennaskola 19 ara i Sverige....aetli islenskir haskolar geti adlagad sig ad thessu thegar stytting til studentsprofs verdur ad veruleika?

ps: thid verdid svo bara ad bida tholinmod eftir ad bloggid mitt lagist, eg get ekkert i thessu gert nema segja ##$%%%*&%#

Bara að athuga hvort það komi íslenskir stafir!
ðþæö
í é á

Tómlegt

Það er tómlegt í dag í húsinu mínu. Búið að vera mikið af yndislegum gestum sem hafa skemmt sér og okkur. Mikið er maður lánsamur að eiga góða fjölskyldu og góða vini sem nenna að heimsækja okkur til Örebro...nú eru allir gestirnir farnir,
rútínan að komast í gang sem er auðvitað gott en í dag er í mér svona týpískt sunnudagsþunglyndi, ætti að vera að vinna en leyfi mér aðeins að velta mér upp úr tómleikanum. Drakk morgunte með Rósu sem er núna flutt til Gautaborgar ásamt sínum fylgifiskum "andvarp" Já svona eru sumir dagar tómlegir en minna mann um leið á hvað maður er heppinn....nú ætla ég að hætta þessu og fara að hlakka til að kynnast Finnunum og Kínverjanum sem eru víst að fara að byrja í skólanum mínum og já að fá hana Lilý vísindakonu hingað til Örebro..verið þið velkomin!

hálfvitaháttur

Hvað myndir þú gera ef einhver færi að kenna barninu þínu að allir samkynhneigðir þyrftu að fara í meðferð til að verða gagnkynhneigðir og eingöngu þannig væri hægt að stuðla að hamingju þessa "ógæfusama" fólks?

“Villist ekki! Hvorki munu saurlífismenn…né kynvillingar guðs ríki erfa!(1.Kor6:9)

Hvurslags hálfvitaháttur er þetta?

blíðan

...og sumarið heldur áfram. Það er gott að vera í fríi heima hjá sér og slappa af og taka dagstúra hingað og þangað. Fara á ströndina, halda matarboð á veröndinni, buslupartý og
forafmælispartý. Fara í veislur, klæða sig upp hvort sem það er í grímubúning eða ballkjól, "andvarp". Og ævintýrið heldur áfram fullt af vinum og vandamönnum á næsta leyti og helstu áhyggjurnar snúast um að blíðan taki sér hvíld og rigningin leysi hana af....

...já og takk fyrir allar kveðjurnar, okkur finnst alltaf svo gaman að fá kveðjur!
....Hæ Siva vona að þú kíkir aftur á okkur, ertu kannski sjálf með heimasíðu?