Hálfur lýðheilsufræðingur

Það sér fyrir endann á fyrsta árinu, get næstum formlega sagt að ég sé hálfur lýðheilsufræðingur. Á þriðjudaginn ver ég síðasta verkefni annarinnar og get þá andað dýpra. Hugurinn er að lenda í rólegheitum, hélt alveg frábært partý í gær og var með næturgesti alla leið frá Rúmeníu, Austurríki og Eþíópíu, leysti þau út í morgun með "english breakfast" sem etinn var með list úti í sólinni. Sem betur fer tók einhver myndavélina og tók nokkrar partýmyndir, því miður alltof fáar því ég hefði svo gjarnan viljað ná þessarri yndislegu, glöðu og afslöppuðu stemmingu enn frekar sem ríkti hér í gærkveldi. Í dag byrjaði ég formlega að hlakka til Íslandsfararinnar, er búin að vera með á heilanum að anda að mér íslensku lofti, svolítið köldu, hreinu og tæru.

ekki í frotté hagkaupsbrók

Jæja nú fer að líða lengra milli færslna allavega í bili þar sem prófalestur og lokagerð tveggja stórra verkefna stjórna lífi mínu um þessar mundir.

Það var langþráð hvíld frá náminu að vera listakona í eitt kvöld, svo skemmtilegt og píkublómin mín skutu rótum í hjörtum Svíakvenna. Þetta verk gefur mér svo mikið og það er víst ábyggilegt að ég mun halda áfram að útbreiða boðskap blómanna. Ég spjallaði heillengi við konu sem hugsanlega getur komið mér í samband við eiganda gömlu járbrautastöðvarinnar hér í Stångby en þar væri mjög góð vinnuaðstaða fyrir mig og penslanna. Elska svona þegar tækifærin eru á næsta horni, vona að þessu fylgi eftirmáli.

Við áttum indæla helgi en við vorum með einn af bestu vinum hans Harðar Breka, frá Örebrú, í heimsókn og gistingu um helgina meðan foreldrar hans skruppu til Köben. Það var svo gaman að sjá þá saman en líka svolítið sárt um leið þar sem það er langt á milli hittinga og það var sem ég bjóst við stráksi minn skældi svolítið í koddann sinn í kvöld miður sín yfir aðskilnaði þeirra félaga. Samt svo stolt af honum og hversu tjáningaríkur og hlýr hann er en hann skrifaði vini sínum fallegt bréf um hversu vænt honum þætti um að hafa eytt helginni með honum og sendi honum hlý faðmlög, ég ætla að setja bréfið í póst strax í fyrramálið.

Við fórum í "busfabriken" með strákana, unglingana og skottuna, skemmtum okkur þrælvel og við Nanna létum gabba okkur upp á "eldfjall" renndum okkur skelfingu lostnar niður og ég þakkaði fyrir að ekki svo margir voru á svæðinu því ég var í kjól sem auðvitað flettist upp yfir haus í hamaganginum, sem betur fer var ég ekki í frotté hagkaupsbrók hehe.

Hafið það gott öllsömul, hér verður tíðindalítið næstu daga en ég þigg rafræn knús sem endranær

OM-TANKE, kvällsöppet

Mina kära
Jag vil bjuda er till kvällsöppet, hos OM-TANKE, torsdag 15 maj, kl 19-21, Stora södergatan 12 Lund. Där ska jag ha en utställnig på mina fittblommor gjorda av tovad ull. Fittblommorna är mitt sätt att visa respekt för det kvinnliga, representera liv och växt och påminna kvinnor att vara stolta över sina egenskaper samtidigt som jag protesterar att "estetiska" operationer på fittor blir alltmer populära. Författarinnan Anna Scholtz kommer också att berätta om sin barnbok Flickans lilla.

Dear friends and collegues, I want to invite you to an "open evening" at the yoga center Om-Tanke at Stora södergatan 12 Lund on thursday night, the 15th of May at 19-21, where my pussyflowers will be exhibited. The pussyflowers are made of carded wool and are my way to show respect for femininity, to represent life and growth reminding women to be proud off themselves as well as to protest the fact that "aesthetic operations" on pussys are getting more common. Eco wine and chocolate will be provided. The writer Anna Scholtz will also present and discuss her book "Flickans lilla".

Monti Grobbason í Stångby

þetta var yndisleg helgi, Lilýlillan kom í heimsókn og við nutum lífsins með henni, ljúfastan gladdi okkur öll. Borðuðum hér úti í garði með Tobbu og kó á föstudagskvöldinu og smjöttuðum á jarðarberjum og ananas sveipuðum ljúfengri súkkulaðisósu. Meðan frúrnar og ungfrúin ræddu listir og unaðssemdir horfðu börnin ásamt feðrum á klassíska bleika pardus mynd, hlátursrokurnar heyrðust til næstu bæja. Við vorum boðin í brunch til Tobbu Túttu á laugardegingum og það var með eindæmum rausnarlegt eins og alltaf. Þar voru staddar nokkrar góðar íslenskar valkyrjur til viðbótar og hersingin fór á flóamarkað í hverfinu. Stórkostlegt að sjá á eftir Tobbunni um leið og skotið var inn, reykjarmökkurinn stóð aftan úr henni enda gerði hún líklega bestu kaupin ásamt syni sínum sem keypti sér þetta fína sjónvarp á fimmtíu kall, sjaldan fellur eplið langt frá eikinni. Við Valur keyptum okkur tvo týpíska sænska ruggustóla, handsmíðaða með fallegu handbragði, núna sitjum við öllum frístundum á veröndinni og ruggum í takt og tyggjum strá. Við snæddum svo íslenskt grill lamb á laugardagskvöldinu, sem var unaður en ég skellti deginum áður í mortél:

Vænum slurki af fersku rósmaríni, timjani og hvítlauk (úr garðinum, montigrobbason), fínt rifnum sítrónuberki og slurki af olívuolíu og kramdi vel og lengi. Kryddaði lambið með gamla góða aromatinu og kött og grillkryddinu, nuddaði því vel inn í, smurði svo með mortélsmaukinu, vafði inn í álpappír og lét taka sig í sólarhring, grillaði við vægan hita og kjetið bráðnaði í munni og var svo gott að beinið var nagað svo stór sá á.

Ströndin var áfangastaður sunnudagsins. Krakkarnir og Valur voru dugleg að stíga í saltan sjó en ég sá um að passa svæðið okkar á meðan með Lilý, því miður engar myndir úr strandferðinni en Monti Grobbason gleymdi myndavélinni...já sem sé frábær helgi og viðburðarrík, takk fyrir mig.

Vormyndir

Svona af því að ég ætlaði að vera að undirbúa mig fyrir viðtölin sem ég er að fara að taka í næstu viku datt mér í hug að setja inn nokkrar myndir. Föstudagskvöldið var fullkomið í alla staði, ljúf kvöldstund og maturinn sem var eldaður lengi og af alúð var svo góður að ég er enn að hugsa um hann. Við vorum svo full af orku á laugardeginum að við unnum í garðinum og læt ég fylgja nokkrar vormyndir af honum. Dagurinn í dag var frábær en við fórum í þjóðgarð hér aðeins norðureftir og ég mun blogga um þá ferð næst, næst þegar ég þarf að undirbúa viðtal.

njótandi, verandi og borðandi

Ég er að baka ítalskan hrísgrjónabúðing og mér sýnist á öllu að útkoman verði ekki jafn falleg og myndin í matreiðslubókinni, vona samt að bragðið verði gott. Það er veisla í kvöld og við eigum von á kálfakjöti í madeirasósu, réttur ættaður af kúbverskum veitingastað í Prag hvorki meira né minna og við sem sé sjáum um eftirréttinn sem verður bara kaffærður í berjum og flórsykri svo ólögulegheitin sjáist síður. Á morgun er einn mánuður eftir af önninni og lokasyrpan að taka við með tilheyrandi álagi og fíneríi, ætla að slappa vel af í kvöld með góðum vinum og njóta í botn vitandi að næsta veisla verður eftir mánuð, í garðinum mínum með barbeque og tilstandi. Í gær keypti ég flugmiða handa mér og börnunum (Valur fer aðeins á undan til að vinna fyrir flugmiðanum) við fljúgum beint til Akureyrar 8. júní og förum svo heim þann 29. júní, sléttar 3 vikur, við hlökkum til.

Í kvöld ætla ég að vera með glimmeraugnskugga og gloss, njótandi, verandi og borðandi með fylgifiskunum mínum, Tobbu túttu, Sveina og rauðhærðu tryppunum þeirra.