Latur dagur

Þið vitið að mér finnst Svíar stundum klikk...en í morgun þegar ég var úti í göngutúr þá fylltist ég sænskri þjóðerniskennd þegar verið var að draga sænska fánann að húni hjá nágrönnum okkar. Það bætti á rómantíkina að sólin skein í gegnum furutrén, fuglarnir sungu svo nautnalega og ekki snjóarða á jörðu. Elska tilfinninguna sem fylgir vorkomunni. Núna klukkan 1705 er reyndar grámyglulegt, skýjað en allavega 9 stiga hiti. Frekar ólíkt veðurfar fyrir ári síðan þegar við böðuðum okkur upp úr snjónum sælla minninga en þið getið rifjað það upp með því að fara eitt bloggár aftur í tímann.

Áttum yndislegan dag í gær, fórum í göngutúr í blíðskaparveðri í nýju matvöruverslunina en löbbuðum reyndar heim í rigningu og roki í bakið. Með híbýlablað handa mér, barbíblað handa Dagrúnu og Kalle anka blað handa Herði Breka í poka. Kveiktum á kertum þegar heim var komið, hituðum kakó og höfðum það huggulegt, endaði með því að við sofnuðum öll í klukktutíma, það finnst mér vera lúxus. Um kvöldið borðuðum við hjá Evu og Sven, grænmetislasagna, sænskar kjötbollur, salat og thaisiki, dýrðlegan púðursykurmarengs með rjóma og ávaxtasalati með graskerafræum í eftirmat og drukkum alvöru kaffi. Horfðum á lokaúrslit í melodifestivalen og erum himinlifandi sæl með úrslitin.

Dagurinn í dag, latur dagur, fórum í bæinn við skötuhjúin og nutum þess að börnin voru í heimsóknum hjá vinum sínum, fengum okkur kaffi og bara röltum. Núna er ég að fara að pakka fyrir London en ég verð þar næstu viku og stúdera list vonandi í miklum móð...aldrei að vita nema ég kíki í nokkrar búðir líka.

Heyrumst eftir viku elskurnar mínar!